Рочиштето за случајот „Сопот“, прво откако предметот го презеде Специјалното јавно обвинителство, е одложено бидејќи судијката, Дијана Груевска-Илиевска, што го води предметот била на службено патување. Судот, го презакажа рочиштето за 9 октомври.
Обвинителката на СЈО, Фатиме Фетаи, изјави дека очекува судењето да почне што побргу, бидејќи веќе неколку години се одложува, но не сакаше да открие со какви аргументи ќе настапи СЈО во постапката.
Во судот денеска беа присутни петмина од вкупно 10 обвинети во случајот.
Инаку, „Сопот“ е судски случај во кој селани од кумановското село Сопот беа обвинети за тероризам, односно за поставување мина на пат на која нагази теренско возило на НАТО со полски војници и со наши државјани. Загинаа двајца војници и еден македонски граѓанин. За тоа дело, 11 лица беа осудени на затворски казни. Случајот подоцна беше вратен на повторно судење, кое постојано се одложува.
Во еден од прислушуваните разговори што во 2015 година ги објави тогаш опозицискиот СДСМ, односно во „25. бомба“, поранешната министерка за внатрешни работи и ексдиректорот на Управата за безбедност и контраразузнавање, Гордана Јанкулоска и Сашо Мијалков, разговараат за случајот „Сопот“ и за тоа каква пресуда треба да биде донесена против обвинетите.
СЈО овој случај го побара од Обвинителството за организиран криминал и корупција во ноември минатата година, а му беше предаден на почетокот на јули годинава.
Фетаи во мај оваа година изјави дека СЈО има сознанија дека исказот на главниот сведок во случајот Рамадан Бајрами бил изнуден со тортура од страна на службени лица од МВР, односно со употребена на сила и закани по неговиот личен интегритет. Како што истакна обвинителката, иако гонењето за тортура застарело во 2008 година, „овие докази и фактите што произлегоа од истрагата (на СЈО) имаат директни импликации врз постапката што се води во Основниот суд Скопје 1“.
