Националниот оператор на пазар со електрична енергија „Мемо“, го воспостави првиот организиран пазар на електрична енергија во Северна Македонија. По тој повод, премиерот Димитар Ковачевски преку писмо го нагласи и значењето во процесот на поддршката на Секретаријатот на Енергетската Заедница и на УСАИД.
„Ова е уште еден голем ден за економијата и за перспективите на граѓаните. Започнува со работа првата македонска берза за тргување со електрична енергија. Снабдувачите на енергија за индустријата и институциите, како и трговците, повеќе нема да бараат енергија на странски пазари. Преку берзата за тргување со електрична енергија, на македонскиот пазар, ќе се побарува и добива електрична енергија“, напишал Ковачевски во писмото.
Снабдувачите ќе побараат и платат енергија денес и ќе ја добијат веднаш – утре.
Работата на оваа берза, значи сигурност за производството на струја, сигурност за болниците, за училиштата, за сите институции, кои набавуваат енергија на либерализираниот пазар, односно, стабилно снабдување со струја и можност за ефикасна набавка на достапни количини на струја.
„За компаниите и за инвеститорите ова е можност за транспарентно и недискриминирачко тргување со електрична енергија. За државата и за граѓаните, почетокот со работа на берзата, значи можност за нови странски инвеститори, кои ги мотивираме да инвестираат во обновливи извори на енергија во земјава“, навел Ковачевски во писмото.
Неговата визија е Македонија да биде модерна, целосно интегрирана земја во европскиот енергетски пазар.
„И Владата, преку „Мемо“, веќе го направи клучниот чекор за поврзување со регионалните организирани пазари и со европскиот пазар, согласно Пан-европскиот модел. Отворањето на македонската берза за електрична енергија можело и требало да се случи уште пред 10 години, но не случајно е денес“, се додава во писмото.
