ВМРО-ДПМНЕ синоќа соопшти дека од партијата поднеле тужба до Управниот суд поради решението на Државната изборна комисија со кое се уважи приговорот на политичка партија Движење Беса и се поништија резултатите од гласањето на гласачко место во општина Гостивар, ИЕ6.
„Ваквата незаконска одлука на Државната изборна комисија директно влијае на вкупните изборни резултати на штета на Коалицијата за подобра Македонија и ја оспорува јасно изразената волја на мнозинството од македонскиот народ“, соопштија од ВМРО-ДПМНЕ.
Од партијата велат дека во рамки на тужбата, правната служба на ВМРО-ДПМНЕ и на Коалицијата за подобра Македонија приложила бројни докази и аргументи со кои се потврдува незаконитоста и неоснованоста на одлуката на ДИК.
ВМРО-ДПМНЕ во соопштението повикува да не се врши притисок врз Управниот суд од никого и судиите да одлучуваат исклучиво врз основа на закон.
„Секое поинакво постапување би било фалсификување и крадење на јасно изразната волја на граѓаните со постизборен инженеринг“, стои во соопштението.
Претходно од СДСМ соопштија дека поднеле тужби до Управниот суд за четири одлуки на ДИК, додека од Беса рекоа дека нема да поднесат тужби бидејќи се сомневаат во независноста на судот.
