Главниот осомничен за геноцидот во Руанда во 1994 година е уапсен вчера во Демократска Република Конго, соопштија денеска Обединетите нации (ОН).
Педесет и тригодишниот Ладислас Нтаганцва е обвинет дека стои зад организирањето на масовните силувања и масакр на илјадници луѓе во геноцидот во Руанда во кој загинаа околу 800.000 луѓе.
Тој е еден од деветтемина осомничени кои се на листата на лица барани од Обединетите нации поради вмешаност и улога во геноцидот.
Соединетите Американски Држави имаа распишано награда од 5 милиони долари за апсење на Нтаганцва. Како што пренесуваат светските агенции, се очекува на Нтаганцва да му биде судено во Руанда.
Во геноцидот во Руанда од 1994 година, милициите на мнозинската етничка група Хуту, според процените, убија од 500.000 до еден милион Тутси и умерени Хути, во колежот кој траеше речиси 100 дена.
