„Наставнички пленум“, зедно со пленумите на студентите, средношколците и на професорите, добија уште еден непринципиелен непријател – нивниот синдикат, Самостојниот синдикат за образование, наука и култура (СОНК), велат од „Цивил“.
„СОНК врши притисок и своевиден мобинг на своето членство во обид да се заштити владата на начин кој е очигледен до вулгарност. Заедно со владата и со ресорното министерство, СОНК врши притисок и врз учениците, нивните родители и врз „Средношколски пленум“, меѓу другото, и со заканите дека родителите ќе бидат казнети доколку отсуствуваат учениците од настава, а со тоа, практично, ги забрануваат најавените протести на учениците.
Ги потсетуваме учениците и родителите на нивното неприкосновено право на слобода на изразување и на правото на протест, а воедно и на законските одредби според кои, во одредени околности, се предвидува казнување за 25-дневно непрекинато отсуство на ученикот од наставата, а не за протест. СОНК во минатото покажа дека е пион на владата, но сега и официјално влезе во отворен фронт против своите членови, што за нас е уште еден срамен преседан во синдикалното дејствување во Македонија“, се вели во соопштението од „Цивил“.
Од „Цивил“ велат дека се солидаризираат и ги поддржуваат сите пленуми кои се залагаат за подобро образование, ослободено од партиските стеги и крајно лошите политики и практики на владата.