Илјадници мигранти се заглавени во меѓуграничната зона на грчко-македонската граница откако македонските власти престанаа да ги пропуштаат авганистанските државјани и дозволуваат само влез на лица од Сирија и од Ирак.
„Би-Би-Си“ пренесува дека во моментов на границата се заглавени околу 5.000 мигранти, а во меѓувреме во грчкото пристаништето во Пиреја пристигнале нови 4.000 мигранти.
Од Министерството за внатрешни работи (МВР) денеска, иако најавија, досега нема никаква информација за состојбата на јужната граница и од кога и зошто не се пропуштаат мигранти од Авганистан.
Денеска за ова реагираше и грчкиот министер за миграциски прашања, Јанис Музалас, кој ја обвини Македонија дека го крши договорот за бегалската криза, со кој се гарантира дека границите за бегалците ќе бидат отворени и слободни за премин до 6 март.
Во меѓувреме, кај котата 59 на македонско-грчката граница, како што пренесува „Телма“, владее тензична атмосфера. Покрај забранетиот влез за мигрантите од Авганистан, почнаа да се спорведува и новата процедура за регистрирање на мигрантите од Сирија и од Ирак. Миграните, освен потврдите издадени од грчките власти, мора да поседуваат пасош, лична карта или возачка дозвола за идентификација и за утврдување на местото од каде доаѓаат.
Зошто е донесена одлуката со која е забранет влезот за авганистански државјани и и од кога е таа на сила, како што пренесува „Телма“, не кажуваат ниту од Центарот за управување со кризи.
Од МВР вчера за „Мета“ информираа дека на македонско-српската граница, кај Табановце се заглавени повеќе од 600 мигранти, оти српските власти одбиваат да ги пропуштат.
