До овој момент одлуката на извршниот и на централниот комитет на ВМРО-ДПМНЕ е да има избори на 24 април, истакна Никола Тодоров, член на ИК на ВМРО-ДПМНЕ, во попладневните вести на телевизија „Сител“.
– ВМРО-ДПМНЕ е демократска партија, со висок степен на демократија, внатрешна демократија, во органите и во телата на партијата. Во овој момент одлуката на извршниот комитет на ВМРО-ДПМНЕ и одлуката на централниот комитет на ВМРО-ДПМНЕ е за избори на 24 април – рече Тодоров.
Пратениците во Собранието на Република Македонија имаат рок уште два дена да побараат да се промени веќе донесената одлука со одложено дејство за распуштање на 24 февруари.
Формално, Собранието е распуштено по експресно донесената одлука на 18 јануари во отсуство на СДСМ и според тоа, одлуката со одложено дејство треба да стапи на сила на 24 февруари, односно 60 дена пред изборите.
Ова може да се смени ако се стопира оваа одлука, за што се потребни гласовите на 62 пратеника.
