Светската здравствена организација (СЗО) денес ќе одржи консултации за преглед на новите податоци поврзани со варијантата на коронавирусот, Oмикрон. Експертите ќе ги разгледаат достапните докази по што критички ќе ги оценат податоците и ќе го сумираат толкувањето на доказите и следните чекори, наведено е во соопштението.
Претходно Тедрос Аданом Гебрехесус, на СЗО предупреди дека Омикрон се шири со најголема брзина во споредба со другите варијанти и повика светот да ги искористи сите расположливи алатки за да се бори со пандемијата на коронаврусот.
„Не станува збор за вакцини наместо маски, дистанцирање, вентилација и хигиена на рацете. Правете го сето тоа. Правете го постојано и правете го добро“, рече тој додавајќи дека само вакцините нема да ја извлечат ниту една земја од кризата.
Гебрехесус повторно ја нагласи нееднаквоста во пристапот до вакцините велејќи дека додека многу од западните држави се тркаат за „бустер“ дози, голем дел од посиромашните држави уште немаат добиено ниту по една доза за имунизирање на својата популација и информираше дека 41 држава сè уште не успеале да вакцинираат ниту 10% од своето население, додека 98 држави низ светот не достигнале до нивото од 40%.
„Доколку ставиме крај на нееднаквоста, ќе ставиме крај на пандемијата. Доколку дозволиме нееднаквоста да продолжи, ќе дозволиме и пандемијата да се развива понатаму“, рече Гебрехесус.
Omicron is spreading at a rate we have not seen with any previous variant. I need to be very clear: vaccines alone will not get any country out of this crisis.
It’s not vaccines instead of masks, distancing, ventilation or hand hygiene.
Do it all. Do it consistently. Do it well. pic.twitter.com/YAVfJXsviQ— Tedros Adhanom Ghebreyesus (@DrTedros) December 14, 2021
„Да бидеме јасни – СЗО не е против „бустер“ дози. Ние сме против вакциналната нееднаквост. Тоа е прашање на приоритети. Давање на бустер дози на групи кои се со низок ризик за сериозна болест или смрт едноставно ги става во ризик оние кои се со висок ризик, а кои сè уште ја немаат добиено својата прва доза“, подвлече директорот на СЗО.
Докторката од Јужна Африка, Анџелик Кеце која ги откри сите податоци со кои таа располага околу новиот сој во колумна за британскиот „Дејли мејл“ смета дека сè уште не знаеме ни приближно доволно за омикронот.
„Мојот прв случај со омикрон, млад човек кој дојде во мојата канцеларија, на почеток мислеше дека бил на сонце предолго откако работел надвор. Пациентите обично имаат болки во мускулите, болки во телото, главоболки и се малку уморени. И симптомите не стануваат ништо полоши од тоа. По околу пет дена исчезнуваат и толку. Во делот на Јужна Африка каде што работам немаше многу пациенти со омикрон кои беа испратени во болница, а повеќето се лекуваа дома со употреба на антиинфламаторни лекови. Имајте на ум, исто така, дека повеќето од оние кои добиваат омикрон овде се невакцинирани или пимиле само прва доза од вакцината“, изјави таа.
Докторката Кеце ги оцени како „хистерични“ потезите на британската влада и на неколку други земји кои воведоа строги ограничувања за патување на летовите од цела јужна Африка и воведоа построги правила за носење маска, казни и продолжен карантин по предвидувањрто дека до крајот на декември ќе има еден милион нови случаи и 10.000 хоспитализирани дневно.
„Треба само да ја погледнете сликата во Јужна Африка, каде што беа забележани првите познати случаи на сојот на омикрон во светот, за да разберете дека оваа реакција е надвор од секоја пропорција на ризик што го носи оваа варијанта. И тоа треба јас да го знам – затоа што јас сум докторот кој прв го вклучи алармот за омикрон, уште во ноември годинава“, напиша Кеце.
