Стотици летови на аеродромот во Франкфурт вчера беа откажани, откако зимската бура го принуди германскиот авијациски центар накратко да ги запре полетувањата и слетувањата.
„Повеќе од 300 од околу 1.000 планирани летови во четвртокот беа откажани“, изјави портпаролката на аеродромскиот оператор Фрапорт, пренесе германската агенција ДПА.
Авионите пристигнуваат во Франкфурт и поаѓаат од аеродромот, но воздушниот сообраќај сè уште се опоравува по невремето од замрзнат дожд и снег во поголемиот дел од западна и јужна Германија.
Не е познато дали ќе има уште откажувања во текот на денешниот ден, а портпаролката ги повика патниците да го проверат статусот на нивните летови преку интернет пред да се упатат кон аеродромот.
Аеродромот во Франкфурт е најголемиот во Германија и меѓу најпрометните во Европа.