Deri në fund do të angazhohem që t’iu jepet fund dukurive negative në arsim, sepse përgjegjësia jonë është që të sigurojmë arsim cilësorë për shoqëri të shëndosh dhe vizion evropian të shtetit tonë. Shpresoj që për këtë të kem edhe mbështetjen e juaj, të komunitetit të akademikëve- theksoi ministri i arsimit dhe shkencës, Abdilaqim Ademi, në debatin publik që u mbajt në Kuvend për reformat e propozuara në arsimin e lartë.
-Kur vendosëm të propozojmë ndryshime, ishim të udhëhequr nga disa parime dhe për këtë propozuam provimin shtetërorë ta zbatojë Këshilli për akreditim dhe evaluim, trup i cili në të ardhmen do të numërojë 11 anëtarë dhe do të zgjidhet nga Kuvendi dhe trup i cili kryen akreditimin dhe evaluimin e programeve studimore të institucioneve publike dhe private të arsimit të lartë në R. e Maqedonisë- tha Ademi.
Ai shtoi se përderisa për ligjin është debatuar në Kuvend, nga disa universitete dhe organizata studentore kanë arritur propozime konkrete për harmonizimin e programeve studimore nëpër institucionet e arsimit të lartë me programet studimore të universiteteve me renditje më të lartë në botë si dhe propozime konkrete për provimin shtetërorë.
Ademi tha se nëse ka propozim në formë të amendamenteve nga ana e grupeve të deputetëve, të njëjtit do të pranohen.
