Во скопската населба Карпош, кај Млечниот ресторан, утринава со огнено оружје бил убиен маалскиот миленик Тоби, за кој долго време се грижеле жителите. Според сведоштвата на активистите и лицата кои го пријавиле случајот, кучето било застрелано помеѓу 8:30 и 9 часот утринава.
Убиството го потврдија и од Министерството за внатрешни работи (МВР).
„На 27.02.2023 во 12.50 часот во Полициска станица Карпош В.П. пријави дека пред зграда на ул.Борка Талевски има усмртено улично куче, најверојатно погодено со воздушна пушка. Полициски службеници излегле на местото и се преземаат мерки за расчистување на случајот“, велат од МВР.
Според сведоштвата на активистите од тој реон, ова не е прв случај да се пука во маалски миленик. Неодамна со огнено оружје на истата локација било пукано и во друго куче, кое преживеало.
