Влегувал на сила во религиозни објекти и одземал пари, при што во летниот период успел да ограби пет цркви во тетовскиот регион. Министерството за внатрешни работи (МВР) денеска соопшти оти уапсиле 53-годишен жител на Штип, кого го сомничат за извршените кражби во цркви.
„Денеска (31.08.2023) околу 10.30 часот во тетовско Долно Седларце, полициски службеници од СВР Тетово го лишиле од слобода 53-годишниот Т.Б. од Штип. Тој се сомничи дека во периодот од 20 јуни годинава досега, извршил пет кражби во цркви во општина Јегуновце. Со употреба на сила влегувал во објектите и најчесто одземал пари. Кај него биле пронајдени и одземени разновиден алат што го користел при извршување на кривичните дела. Т.Б. е задржан во Полициската станица Тетово и по целосно документирање на случајот ќе биде изготвена соодветна кривична пријава“, се наведува во соопштението на МВР.
