Пет лица си ги фотографирале гласачките ливчиња во текот на денешното гласање, соопшти Министерството за внатрешни работи (МВР).
Станува збор за два случаи во Скопје и по еден во радовишко, Охрид и Берово.
Околу 11 часот и 10 минути било пријавено дека во селото Коџалија, Општина Радовиш, на избирачкото место 1602, С.А. од селото си го фотографирал гласачкото ливче.
Истото го сториле и А.С. (40) и С.С. од Скопје. Првиот околу 12 часот на избирачкото место број 2683/1, а вториот околу 14 часот на избирачкото место 2555 во Скопје.
Околу 12 часот и 15 минути во полиција било пријавено и оти А.И. (48) од Охрид го фотографирал гласачкото ливче на избирачкото место број 1271 и истиот е приведен во полициска станица.
Приведен е и жител на Берово – 42-годишниот Д.Т. кој исто така го фотографирал своето гласачко ливче на избирачкото место број 0006 во Берово.
МВР соопшти дека се преземаат мерки за расчистување на случаите.