Споменик како симбол на борбата на текстилните работници ќе биде откриен во Штип за време на 4. Текстилијада, која е закажана за средината на октомври. Советот на општина Штип ќе одлучува за иницијативите за поставување на мермерен споменик во чест на текстилните работници, како и за прогласување на 16 октомври за Ден на текстилните работници во Штип.
Делото „Магичен конец“ е симболичен назив на мермерната скулптура, што ја изработи вајарот Андреј Митевски, со димензии од 180х210х10 сантиметри. Истото е предвидено да се постави во паркот во Суитлакот.
– Мотивите на ова дело се динамичните движења на конецот, кој ја симболизира борбата на текстилните работници на нивните права и е паметник на нивната борба за права – објаснуваат од здружението на граѓани „Гласен текстилец“ во нивната иницијатива.
Минатата година во Штип осамна инсталација од четириметарска игла со конец, како симбол на текстилната индустрија, во која работат неколку илјади работници.
