Јужна Кореја, Јапонија и САД го критикуваат снабдувањето со оружје и воена опрема од Северна Кореја до Русија, велејќи дека се потврдени неколку испораки, соопштува Гардијан.
Новинската агенција Ројтерс во Сеул известува дека Русија и Северна Кореја негирале трансфер на оружје за употреба во руската војна против Украина, а постојат извештаи за кои Вашингтон и истражувачите велат дека покажуваат движење на бродови со контејнери, најверојатно со оружје меѓу пристаништата на двете земји.
И покрај тоа што не било можно да се потврди содржината на пратките, извештаите велат дека контејнерите од северот подоцна биле забележани во руски складишта за муниција во близина на границата со Украина.
„Република Кореја, Соединетите Американски Држави и Јапонија силно го осудуваат обезбедувањето на воена опрема и муниција од страна на Демократска Народна Република Кореја (ДНРК) до Руската Федерација за употреба против владата и народот на Украина“, велат тие во соопштение.
„Таквите испораки на оружје, од кои неколку сега потврдуваме дека се завршени, значително ќе го зголемат бројот на изгубени животи од руската агресивна војна“, се вели во соопштението објавено од министрите за надворешни работи на трите држави.
Северна Кореја бара воена помош од Русија за да ги унапреди сопствените воени капацитети во замена за поддршката за Москва во вооружување, се вели во соопштението.
„Внимателно следиме какви материјали Русија и дава на КНДР за поддршка на воените цели на Пјонгјанг“, се вели во извештајот и се додава дека секоја трансакција со оружје со Северна Кореја прекршила повеќе резолуции на Советот за безбедност на ОН за кои гласала самата Москва.
Северна Кореја и Русија ветија поблиска воена соработка кога нивните лидери се сретнаа во септември на далечниот исток на Русија. Шефот на руската дипломатија Сергеј Лавров, пред неколку дена се сретна со севернокорејскиот владетел Ким Џонг-ун и разговараше за спроведување на договорите постигнати на самитот.