Министерството за образование и наука (MOН) следниот месец ќе објави конкурс за доделување 600 стипендии за ученици кои се запишани во јавните средни училишта во државава и тоа во дуални паралелки во здравствените струки, каде што има практично образование со зголемен број на часови.
„Учениците запишани во здравствените струки годинава не можат да аплицираат на конкурсот за доделување 1.500 стипендии за ученици запишани во дуални паралелки. МОН одлучи да ги одвои, односно за нив да објави посебен конкурс за стипендии, а целта е на сите ученици кои се дел од дуалните паралелки, да им се излезе во пресрет и да се поддржат со финансиска стимулација поради тоа што одбрале дефицитарни струки“, наведено е во соопштението на МОН.
Оттаму информираат дека започната е постапката за изменување и дополнување на Програмата за остварување и развој на дејноста во ученичкиот стандард за 2023 година. По објавата на конкурсот, аплицирањето ќе се спроведува електронски, преку порталот www.e-uslugi.mon.gov.mk.
Оние кои ќе ја добијат, стипендијата ќе им се исплаќа за целата учебна 2023-2024 година.
