Гувернерот на Флорида, Рон Де Сантис, се откажа од претседателската трка за републикански кандидат на изборите во САД годинава и го поддржа Доналд Трамп. Тој поднесе оставка пред републиканските прелиминарни избори во Њу Хемпшир, пренесува Би-би-си.
Де Сантис се сметаше за силен кандидат за номинација на Републиканската партија, но вчера рече дека „нема јасен пат до победа“.
Повлекувањето на Де Сантис во деновите пред прелиминарните избори во Њу Хемпшир следи по разочарувачкиот резултат на неговата група во Ајова, каде што заврши на второто место, но заостана зад Доналд Трамп со голема разлика. Трамп во Ајова освои 51 отсто од гласовите, Де Сантис – 21 отсто, а Ники Хејли – 19 отсто. Во Њу Хемпшир, пак, неговите бројки заостануваат далеку зад Хејли и Трамп.
Ники Хејли останува единствениот преостанат предизвикувач на Трамп. Тие двајца ќе се соочат утре во Њу Хемпшир во вториот од серијата натпревари за избор на републикански кандидат за општите избори во ноември.
Во видео објавено на социјалната мрежа „Х“, Де Сантис вели дека го поддржува Трамп, кој во моментов е јасен фаворит. Де Сантис рече дека станало јасно оти мнозинството републикански гласачи „сакаат да му дадат уште една шанса на Доналд Трамп“.
Тој ги призна несогласувањата со поранешниот претседател, но рече дека Трамп бил супериорен во однос на Бајден, кој е речиси сигурно дека ќе биде кандидат на Демократската партија на претседателските избори во ноември.
По најавата на Де Сантис, кампањата на Трамп ги повика сите Републиканци да се соберат зад него, критикувајќи ја поранешната амбасадорка на САД во ОН, Хејли, како „кандидат на глобалистите и демократите кои ќе направат се за да го запрат движењето ‘Америка на прво место’“.
И Де Сантис ја нападна Хејли, нарекувајќи ја член на старата републиканска гарда од минатото.
Поранешната гувернерка на Јужна Каролина, Хејли, пак, одговори дека таа е конзервативниот и единствен кандидат кој може да го победи Бајден.
