Прилеп на Илинден осамна без истакнати државни знамиња. Локалната власт, според фотографиите што ги испратија жители на градот, не поставила ниту едно знаме за државниот празник на Република Македонија, 2 Август.
Делагација на локалната самоуправа предводена од претседателот на Советот на Општина Прилеп, Никола Димески, претставници од политичките партии, Здружението на борци од Прилеп и група граѓани им одадоа почит илиденците и на учесниците во антифашистичката борба и на Првото заседание на АСНОМ.
Тие положија свежо цвеќе пред бистите на Методија Андонов – Ченто, Кузман Јосифоски – Питу, Ѓорче Петров, Пере Тошев и на Могилата на непобедените.
Делегација од Прилеп присуствуваше и на чествувањето на Денот на Републиката во Крушево.
Б.Б.