Нови делови од авион биле најдени на островот Рејуниот, во Индискиот Океан, каде во средата беше пронајден дел од авионско крило за кое се претпоставува дека е од летот МХ370 на „Малезија ерлајнс“, кој исчезна во март минатата година.
Како што јавува „Би-Би-Си“, се претпоставува дека објект кој бил пронајден јужно од градот Сент Дени на островот, е дел од врата на авион. Но, од полицијата соопштиле дека засега парчето не се третира како доказ.
Парчето од авионско крило што беше пронајдено во средата е однесено во Франција, каде истражителите во градот Тулуз ќе утврдуваат дали е од МХ370.
Во четвртокот оваа недела, веднаш по откривањето на делот, заменик-министерот за транспорт на Малезија, Абдул Азиз Каправи, изјави дека „речиси е сигурно“ дека парчето потекнува од авион од типот „боинг 777“. Информациите велат дека МХ370 е единствениот „боинг 777“ што исчезнал над Индискиот Океан, со 239 луѓе во него.