Битолскиот театар привршува со подготовките на новата премиера „Геноцид“ во режија на Љубиша Георгиевски.
Оваа драма во седум слики ни ги прераскажува сите наши приказни за уривањето, за злосторствата, за мирот и за војната, за вистината и за лагата. За мажот и за жената, за човековите страсти и порази, за погубноста на погубувањето, стои во најавите на БНТ за оваа премиера.
– За тежината на овој текст да биде уште поголема, Георгиевски го посветува на „Македонските мајки кои раѓале по едно чедо повеќе отколку што крвниците можеле да „потоморат“. Овој театар не остава ниту еден момент на празнина, ниту каква било сенка која талка по ќошевите на сцената. Ова е театар на којшто театарот му се радува – вели драматург Билјана Крајчевска.
Премиерата на „Геноцид“ е закажана за сабота, 14 март, во 19.30 часот, на сцената на БНТ. Сценографијата и костимографијата се на Мери Георгиевска, а музиката е на Марјан Неќак. Во претставата играат Габриела Петрушевска, Петар Мирчевски, Слободан Степановски.
