Со доцнење од 40 минути, почна лидерската средба во Клубот на пратеници помеѓу лидерите на четирите најголеми политички партии, потписнички на Договорот од Пржино.
Лидерот на ВМРО-ДПМНЕ, Никола Груевски, пристигна последен и сакајќи да ги избегне новинарите, во клубот влезе од задната врата. Него го дочека Александар Ѓеорѓиев, кој е портпарол на Владата.
На средбата, освен Груевски, од ВМРО-ДПМНЕ присуствува и министерот за здравство, Никола Тодоров.
Претставници од СДСМ се лидерот Зоран Заев, заменик-претседателката Радмила Шекеринска и Рената Десковска.
Претставници на ДПА се лидерот Мендух Тачи и Имер Алиу, додека ставовите на ДУИ ќе ги застапуваат лидерот на партијата, Али Ахмети, и Артан Груби.
На средбата присуствува амбасадорот на САД во Македонија, Џес Бејли, и двајца претставници на Делегацијата на ЕУ во Скопје.
На денешната средба лидерите треба да направат пресек колку од условите што ги договорија на 20 јули се исполнети и дали во декември ќе се одржат избори.