По средбата со премиерот Зоран Заев, претседателот на Сојузот на средношколци, Бленди Ходаи посочи дека постои волја за компромис. Тие бараат да полагаат скратена програма за полагање на државна матура со образложение дека немале доволно време да ги подготват испитите.
„Зборувавме со премиерот, кажавме и во јавност ние сме децидни во барањата, но и истовремено отворени да најдеме компромисни решенија. Се надеваме дека до крајот на февруари ќе најдеме решение и ќе ја затвориме оваа дискусија за државната матура. Во случај да не се најде решение до крајот на месецов, тогаш ние ќе кампуваме од 1 март пред Министерството за образование и наука“, рече Ходаи.
Според Ходаи, матурантите бараат целиот материјал што е изучуван за време на пандемијата, од март минатата година до крајот на оваа учебна година да биде со скратен материјал.
Премиерот Заев посочи дека ги поддржува младите средношколци, а Владата била подготвена да разговара за изнаоѓање заедничко компромисно решение во полза на матурантите.
„Како одговорна Влада инвестираме во младите луѓе и водиме грижа за квалитетно образование и понатамошен напредок. Свесни сме дека во време на корона кризата е потребно да излеземе во пресрет и низ дијалог да изнајдеме компромисни решенија“, рече премиерот Заев.
Mатурантите од вчера повторно се вратија на настава, откако го прекинаа бојкотот, со цел да им остават простор на пратениците да најдат решение за модифицирање на државната матура.
Од Министерството за образование и наука пак, не отстапуваат од ставот дека според законската обврска ќе има полагање на државната матура, со оглед на тоа што во предвидениот законски рок, над 14 илјади матуранти веќе пријавиле кои предмети ќе ги полагаат на матурата. Министерката за образование и наука, Мила Царовска досега неколку пати посочи дека за измени во матурата ќе може да се разговара идната учебна година.
