Пред дванаесеттото продолжение на конститутивната седница на Собранието, на која треба да се изберат членовите и претседателот на Комисијата за избори и за именувања и претседател на Собранието, СДСМ и ВМРО-ДПМНЕ преку нивните утрински соопштенија ги повторија своите ставови во однос на политичката криза.
Од СДСМ велат дека постои парламентарно мнозинство од 67 пратеници и дека тие пратеници имаат право и должност да ги изберат новиот собраниски претседател и новата влада.
„Парламентарното мнозинство е избрано од 700.000 граѓани на веродостојни избори. Тоа е претставник на народот. Не Никола Груевски, не ВМРО-ДПМНЕ, кои се веќе опозиција. Затоа пратениците на ВМРО-ДПМНЕ во Собранието се должни да обезбедат здрав разум и продолжување на демократските процеси, наместо да го бранат насилството на Груевски кое му треба за заштита на криминалот и од одговорност“, велат од СДСМ.
Според ВМРО-ДПМНЕ, единственото решение за излез од политичката криза се нови предвремени парламентарни избори.
„Злосторничкото здружение СДС и криминалецот Зоран Заев предавнички ја прифатија тиранската платформа и сите уцени што им беа наметнати само за да дојдат на власт и да се спасат од затвор. Предавниците не само што молчат, туку се обидуваат да спречат секаква дискусија околу штетните последици на тиранската платформа. Ваквиот кукавички чин е најдобар доказ за хистеријата што ги има фатено уценетите криминалци бидејќи не може да се испорачаат сите ветувања кои задираат во највисоките државни и национални интереси“, велат од ВМРО-ДПМНЕ.