Партиите од коалицијата „За подобра Македонија“, денеска ја потпишаа декларацијата „Македонија 2020“, со која се обврзуваат за посветено работење и за реализирање на проектите и подобрување на животниот стандард на граѓаните.
Лидерот на ВМРО-ДПМНЕ, Никола Груевски, по потпишувањето на декларацијата истакна дека ќе работат во насока на сеопшт развој, свесни дека има уште да се работи и убедени дека идеите на државотворност и на одговорност се прифатени од граѓаните.
– Нашите ветувања тежат, а нашите зборови вредат. Сите заедно ќе помогнеме за подобра Македонија. Ние, членовите на коалицијата, се обврзуваме да ги штитиме интересите на македонскиот народ и интересите на етничките заедници – истакна Груевски.
Тој додаде дека и понатаму остануваат посветени на стратешките определби како економскиот пораст, отворањето на нови работни места, влезот на Македонија во ЕУ и во НАТО, унапредување на меѓуетничките односи, борбата со организиран криминал и корупција и инвестиции во секоја област.
