Генералниот секретар на Советот на Европа, Торбјорн Јагланд, и претседателот на Европскиот парламент, Мартин Шулц, гo осудија денешниот напад во Истанбул, додавајќи дека одговорот на тероризмот мора да биде одлучен.
– Европа плаќа висока цена за тероризмот, кој се обидува да ја ослаби нашата доверба во човековите вредности и да го поткопа нашиот начин на живот, но тоа нема да му успее – рече Јагланд, додавајќи дека против овие закани „можеме да се бориме само со заедничка и одлучна акција, останувајќи посветени на владеењето на законите и на почитувањето на човековите права“.
Претседателот на Европскиот парламент, осудувајќи го нападот рече дека Истанбул се нашол на метата на гнасна група терористички фанатици.
– Омраза, насилство и смрт станаа зборови што ја олицетворуваат Исламска држава. Од Париз до Истанбул, од САД до Египет, убиствениот домет на ИД е глобална закана, која бара единство и одлучност за да биде поразена – се вели во соопштението на Шулц.
Генералниот секретар на ОН, Бан Ки-мун, рече дека денешниот терористичкиот напад во Истанбул е „подло злосторство“ и побара виновниците да бидат изнесени пред лицето на правдата.