Косовската опозиција повторно употреби солзавец во Собранието на Косово и така и денеска ја оневозможи редовната седница.
Во моментот на почетокот на седницата на Собранието, пратениците на опозицијата излегле пред говорницата и потоа го активирале солзавецот. Претседателот на Собранието, Кадри Весељи, го оцени овој чин како срамен и најави пауза.
Инцидентот се случи иако собраниското обезбедување го контролираше влегувањето на сите пратеници.
По излегувањето од салата, пратеник на опозициската Самоопределување рече дека е невозможно нормалното функционирање на собранието сè додека владата не го повлече потпишувањето на спогодбата со Србија и со Црна Гора.
Станува збор за спогодбата со заедницата на општини со мнозинство Срби, за кои опозицијата смета дека се создавање на српска паралелна држава на Косово и за спогодбата за демаркација со Црна Гора. Опозицијата тврди дека со овој договор, одземен е добар дел од земјата на Косово.
