Од вкупниот број на починати лица од ковид-19 во периодот од 6 август до 18 ноември, дури 80 проценти биле невакцинирани лица, додека 20 проценти од починатите биле вакцинирани, информираат од Министерството за здравство. Притоа, починатите вакцинирани лица имале повеќе комбинирани хронични заболувања.
Во периодот од 06 август до 18 ноември, на територијата на земјава имало 53.682 лица позитивни на ковид-19. Од нив, 31 процент биле целосно вакцинирани, односно 16.702 лица. Според статистиката за изминативе месеци, 36.980 граѓани, односно 69 проценти од позитивните на ковид-19, не биле вакцинирани.
Процентот на хоспитализирани лица кои се невакцинирани е голем. Во моментов од 534 хоспитализирани пациенти во болниците, само 123 се целосно вакцинирани.
„Министерството за здравство укажува на важноста на вакцинација, секоја вакцина која ја имаме на располагање е безбедна. Апелираме граѓаните да се вакцинираат, само така ќе дојдеме до колективен имунитет и ќе спречиме ширење на мутации на СарсКоВ2“, се наведува во соопштението на Министерството за здравство.
