„По неколкудневното тестирање на над 800 работници во седум штипски текстилни фабрики, може да се каже дека состојбата со ковид-19, 90 отсто е ставена под контрола“, вели директорката на Центарот за јавно здравје во Штип, Марија Димитрова. Таа појасни дека од вкупниот број на тестирани лица, 126 се позитивни или 15,7 отсто од тестираните. Најголем дел од позитивните, или 80 отсто од случаите, се со полесна клиничка слика или се без симптоми.
Денеска истекува 14-тиот ден од регистрираниот прв заболен во конфекцијата „Ти стајал“, каде има 53 позитивни. Во текот на денот се земаат првите контролни тестови на заболените, со цел да се утврди евентуалната негативност, по изминувањето на 14 дена од појавата на болеста, период кога се очекува вирусот да е неутрализиран.
Освен во текстилните фабрики, поради позитивни случаи затворени се две подрачни единици на државни институции, додека една е затворена превентивно.
Затворена е подрачната единица на Фондот за пензиско и инвалидско осигурување (ПИОМ), каде има шест заболени, додека се чекаат резултатите за другите вработени. Во Фондот за здравствено осигурување (ФЗОМ), кој се наоѓа во истата зграда како и ПИОМ, има еден позитивен.
– Непознато е дали се инфицирале од странки или од некој друг извор на зараза. Деноноќно анкетираат пет лица и се обидуваат да ги откријат сите контакти на заразените. Има заразени и во други институции. Тоа што со труд го направивме е стабилизирана ситуација моментално, сите лица кои се позитивни се ставени во самоизолација, и нивните семејства и контакти – изјави Димитрова.
Почетокот на ширењето на заразата во текстилните фабрики епидемиолозите го утврдиле низ анкетите, кој започна на 24 мај со првиот позитивен случај во конфекција. Она што е заклучено досега, на лицето кое прво бешe позитивно, и понатаму лицата кои се појавуваат позитивни, е дека остварувале контакт за време на работен процес, пауза, слободни дружења после работа и за време на патување во автобус.
Засега не е предвиден нови скрининг на конфекциите, бидејќи ситуацијата е под контола.
– Ситуација во најголем процент ја држиме под конторола. Имаме случаи секојдневно на појава на нови заразени, за кои се вршат анкети денеска. Анкетирањето нема да престане – кажа Димитрова.
Работниците кои имаат негативни тестови веќе се вратија на работа. Сепак, остана прашањето, и покрај тоа што се негативни, дали е безбедно да се вратат на работа. Скринингот бил направен во договор со Комисијата за заразни болести и сите работници што се негативни, според Димитрова, можат да се вратат на работа под пропишаните услови за заштита. Над 500 луѓе се во изолација, а од денеска тој број најверојатно ќе биде поголем.
Има наплив од барања за тестирања преку матичните лекари, главно на луѓе од семејствата или нивни пријатели. Поради тоа, од Центарот за јавно здравје биле побарани повеќе термини за лица од Штип за тестирање.
– Од Центарот за јавно здравје им се дозволи преку „МојТермин“ на матичните лекари да пријавуваат лица кои треба да се тестираат. Моментно има многу лица, а тоа е причината што „МојТермин“ не може да одговори на сите бараања – објасни директорката на Центарот за јавно здравје во Штип.
Претстои нов скрининг, овој пат на детските градинки во Штип. Од утре, па во наредните два дена, треба да бидат земени тестови на 237 вработени.
