Федералните обвинители од САД поднесоа обвинение против поранешниот американски претседател Доналд Трамп за неговиот обид да ги поништи изборните резултати во 2020 година, во очајничкиот обид да остане на власт, пишува Би-би-си. Обвинението против поранешниот претседател на САД е покренато само неколку недели откако тој беше обвинет за задржување информации за националната одбрана.
Во обвинителните акти составени од четири точки се тврди дека Трамп извршил заговор со цел да го спречи Конгресот да ја потврди победата на претседателот Џо Бајден, а со тоа избирачите биле лишени од нивните права за фер избори.
Трамп, кој во моментов е заинтересиран за да се натпреварува за нов претседателски мандат, ги отфрли обвиненијата преку социјалните мрежи, нарекувајќи го обвинението како смешно.
Наспроти неговото отфрлање на случајот, специјалниот обвинител Џек Смит на 45 страници детално наведува како Трамп и неговите сојузници свесно ширеле лажни наводи за изборна измама, свикале лажни електори и се обиделе да го блокираат потврдувањето на изборите. По негов повик, поддржувачи на Трамп го нападнаа американскиот Капитол на 6 јануари 2021 година во обид да го спречат Конгресот да ја потврди победата на Бајден.
Изборната истрага се фокусираше на постапките на Трамп во двомесечниот период помеѓу неговата загуба од Џо Бајден и немирите во Вашингтон, каде што неговите поддржувачи упаднаа во Конгресот додека пратениците ја потврдија победата на демократот.
„Нападот врз главниот град на нашата нација на 6 јануари 2021 година беше напад без преседан врз седиштето на американската демократија“, изјави специјалниот обвинител Џек Смит.
Во изминатите четири месеци против Трамп се покренати уште едно федерално и три државни обвиненија.
Трамп се соочува и со сериозни обвиненија поради чување на доверливи документи од Белата куќа во неговиот дом во Флорида.
