Американскиот претседател Барак Обама прогласи вонредна состојба утринава, поради големиот шумски пожар во областа Лејк Каунти, во Северна Калифорнија, кој уништи 1.200 куќи и усмрти три лица.
Врз основа на прогласената вонредна состојба, претседателот на САД ги стави на располагање федералните фондови за расчистување и за реконструкција, вклучувајќи ги и средствата за привремено сместување на населението и за поправка на куќи.
Пожарот што избувна на 12 септември во Лејк Каунти, на 145 километри од Сан Франциско, е една од најголемите катастрофи во историјата на Калифорнија. Огнената стихија, која опустоши 306 квадратни километри земјиште, делумно е под контрола.
Илјадници лица се евакуирани поради пожарот, тројца загинаа, а две лица се водат за исчезнати, соопштија од канцеларијата на шерифот на Лејк Каунти.