Претседателот на НДП, Весел Мемеди, кој е потпретседател на Собранието, денеска на прес-конференција објави дека ако биде разрешен министерот за локална самоуправа Сухејл Фазлиу, неговата партија ќе се повлече од власта. Мемеди рече дека ќе поднесе оставка и за пратеничкото место и на функцијата потпретседател на Собранието, а неотповикливи оставки ќе поднесат и кадрите на НДП на директорски места и во управни одбори.
Тој ги повика СДСМ и ДУИ да се откажат од таквата намера.
– Не може да има пазар за министерско место, бидејќи ова министерство секогаш го воделе министри Албанци, и јас немам мандат да правам пазар во име на Албанците и да го отстапам оваа министерство на коалицискиот партнер на СДСМ. Немам никакво морално право да жртвувам една чесна и способна фигура како што е мојот министер Сухејл Фазлиу. Ако коалиционите партнери СДСМ и ДУИ посакуваат да го продолжат нашиот заеднички пат кон заокружување на финалните цели, со најкоректниот и најчесниот партнер што некогаш го имале, односно НДП, тогаш СДСМ треба да го повлече предлогот за разрешување на нашиот министер, а другиот коалиционен владин партнер ДУИ, да не гласа за разрешувањето на нашиот министер – рече Мемеди.