Меџити: Отворени нови специјализации, вложуваме во младите лекари

Рокот за конкурирање за специјализации на овие факултети тече. Годинава првпат специјализации ќе има и на факултетот во Тетово

Фото: Министерство за здравство, 24 август 2023

Новите огласи, односно новиот конкурс за специјализации, бил темата на денешната средба на министерот за здравство Фатмир Меџити, со деканите на медицинските факултети: во Скопје, проф. д-р Соња Топузовска; во Штип, проф. д-р Милка Здравковска; и претставник од Деканатот на Медицинскиот факултет во Тетово, проф. д-р Невзат Елези.

Рокот за конкурирање за специјализации на овие факултети тече. Годинава првпат специјализации ќе има и на факултетот во Тетово, соопшти Министерството за здравство.

„Младиот кадар е иднината на здравствениот систем, во нив континуирано вложуваме со цел намалување на трендот на мигрирање на нашите едуцирани лекари во странство. Веќе е во тек процес за промена на правилникот за специјализации, согласно европските примери и практики, со цел надополнување на специјалистичкиот кадар согласно конкретните потреби на јавните здравствени установи“, посочи министерот Меџити на средбата.

На средбата се разговараше и за можноста за околу 600 нови вработувања во областа на здравството кои се презентирани на седница на Влада, како и за можностите за вработување на приватните специјализанти.