Од 1 јануари, односно од вчера, косовските граѓани можат да патуваат без визи во сите земји на Европската Унија, кои се членки на шенген-зоната. Визната либерализација им овозможува на косовските граѓани, кои имаат биометриски пасоши, да останат до 90 дена, во рок од шест месеци, во која било од земјите членки на шенген-зоната.
Претседателката, Вјоса Османи, на Фејсбук напиша дека 2024 година започнува со „слобода на движење која предолго и неправедно им се ускратуваше“ на граѓаните на Косово. Косовскиот премиер Албин Курти на денешната церемонија на аеродромот во Приштина побара од граѓаните да ги почитуваат условите и критериумите.
„Нема подобар начин да се започне од проширување на правата и можностите на нашите граѓани. Предолго чекавме, ни беа ускратени многу можности. Затоа, ова е важен ден, а е елиминирана големата неправда и се добива важно право, правото да се патува без виза во шенген-зоната“, рече Курти.