Европскиот совет одлучи да ја прошири безграничната Шенген зона и да ги вклучи Бугарија и Романија, соопшти вчера шпанското претседателство на Советот.
Контролите на воздушните и поморските граници ќе бидат укинати од март 2024 година, а дискусиите за укинување на контролите на копнените граници ќе продолжат и во новата година, се вели во соопштението на Европската комисија.
„Проширената Шенген зона ќе ја направи ЕУ посилна како Унија, внатрешно и на глобална сцена“, изјавија од Комисијата.
Датумот 31 март е избран бидејќи тогаш почнува летното сметање на времето и летниот распоред на летови во авиосообраќајот.
Договорот следеше откако Бугарија и Романија потпишаа заедничка декларација со Австрија во која се обврзуваат да ја интензивираат борбата против илегалната миграција.
„Присуството на Фронтекс на бугарско-турската граница треба да се зголеми најмалку тројно, а контролите на копнените граници меѓу Бугарија и Романија и меѓу Романија и Унгарија ќе треба да се зајакнат“, стои во заедничката декларација на трите земји.