Австрија конечно им дозволи на Бугарија и Романија да влезат во Шенген зоната на ЕУ преку авиосообраќајот и морето од март 2024 година, пишува Медиапул.бг. Оваа информација денеска ја соопшти бугарскиот премиер Николај Денков.
„По долги и комплицирани преговори, постигнавме начелен договор со Австрија за прием на Бугарија и Романија во Шенген зоната. На почетокот со воздушните и поморските граници. Австрија се обврза да ги продолжи преговорите за копнените граници“, изјави Денков на последната седница на владата за годинава.
Претходно и романскиот премиер најави дека Бугарија и Романија ќе влезат во Шенген зоната со воздушните и поморските граници од март 2024 година.
„Преговорите со Австрија ќе бидат комбинирани со значителна поддршка од Европската комисија за заштита на надворешните граници на ЕУ со Турција и Србија, со цел да се намали приливот на илегални мигранти во Европа. По 12 години без голем напредок на темата Шенген, денес можеме да си го честитаме овој неоспорен успех на бугарската држава“, рече Денков.
Според Европската комисија, Бугарија и Романија пред повеќе од една деценија ги исполниле техничките критериуми за пристапување во зоната за слободно патување во Европа. Но, досега тоа не можеше да стане факт поради отпорот на некои земји-членки.
Во 2022 година, Австрија стави вето на пристапувањето на Бугарија и Романија, наведувајќи ја несразмерно големата нелегална имиграција што произлегува од слабо заштитените надворешни граници на Шенген зоната.
Холандија стави вето на членството на Бугарија во Шенген поради недостаток на убедливи чекори во борбата против корупцијата. Законските измени преземени од актуелната владејачка партија за судските и антикорупциските реформи, особено измените на Уставот донесени од парламентот, очигледно ја убедија Холандија да го укине ветото по гласањето во холандскиот парламент на 21 декември.
