Дваесет и тројцата вработени во Државниот испитен центар (ДИЦ) веќе 11 дена се во штрајк и не ги извршуваат нивните работни обврски. Тие бараат повисоки плати, но засега нема никакви најави дека Минстерството за финансии ќе им излезе во пресрет.
„Сите процеси што ги води ДИЦ се стопирани, односно тоа се приправничките испити за наставници, потоа, сите меѓународни тестирања кои вообичаено ние ги организираме и реализираме. Не се работи ниту на државното тестирање, односно не се работи на извештаите иако резултатите од истото, се готови. Во овој период обично се подготвуваат задачите кои ќе се паднат на државната матура, но и тој процес е стопиран. Никој не ја прави годишната програма за работата на ДИЦ, а не се работат ниту напредните обуки и основните обуки за директори“, вели Емилија Бошковска, советничка во ДИЦ.
Во периодот на штрајк, вработените доаѓаат на работа, но не ги извршуваат работните обврски. Како што информира Бошковска, времето го користат за да ги надградуваат своите знаења и организираат меѓусебни интерни обуки.
Во врска со тоа, како течат преговорите со Министерството за финансии, Бошковска вели дека засега нема конкретни најави или ветувања дека платите ќе им бидат покачени.
„Добивме ветување дека идната недела, по Нова година ќе се разгледува нашата ситуација. Ние бараме изедначување на платата со онаа што ја зема наставник-ментор, односно бараме зголемување за околу 8.000 денари. Советник во ДИЦ сега зема 30.000 денари плата, а бараме да биде 38.000“, додава Бошковска.
Вработените во ДИЦ прв пат протестираа во април годинава. Но, иако не добија покачување на платите, сепак го ставија штрајкот во мирување за да им излезат во пресрет на матурантите, за да можат да полагаат матура, која е услов за упис на факултет. Сега продолжија да штрајкуваат додека не им бидат исполнети барањата.
