Еврокомесарот за проширување и добрососедска политика Јоханес Хан во четврток ќе допатува во Македонија, потврдија денеска од Европската комисија.
Ова е прва посета на еврокомесарот по предвремените парламентарни избори, одржани на 11 декември и е во период кога се прават нови обиди за формирање влада, откако ВМРО-ДПМНЕ не успеа да го искористи мандатот. Сепак, Хан официјално доаѓа за да учествува на министерскиот состанок посветен на енергетиката во рамки на процесот „Шест западнобалкански држави“.
„На агендата на комесарот Хан е да дојде во Скопје во четврток. Тој ќе учествува на министерскиот состанок на министрите за надворешни работи и за енергетика (економија) во рамки на процесот ‘Шест западно-балкански земји’. А на маргините на овој состанок, тој ќе има билатерални средби со сите засегнати страни во земјата“, соопштија од кабинетот на еврокомесарот.
Хан со лидерите на политичките партии ќе разговара за постизборните случувања во Македонија.