Поранешната министерка за внатрешни работи и висок функционер на ВМРО-ДПМНЕ, Гордана Јанкулоска, денеска била повикана во Специјалното јавно обвинителство во својство на осомничена во случајот „Титаник“, потврдија за „Мета“ од СЈО.
Оттаму велат дека Јакулоска денеска побарала увид во доказите, поради што, додаваат од СЈО, таа „повторно ќе биде повикана на распит за истиот предмет за да го даде својот исказ“.
Поранешната министерка денеска не сакаше да открие за кој предмет беше повикана и ги упати новинарите одговорот да го побараат кај, како што рече, тој што ги повикал пред просториите на обвинителството.
Таа изјави дека Специјалното јавно обвинителство одамна го загубило кредибилитетот да води какви било постапки кои се повразни со правото, меѓутоа го задржала приматот на еден од најистурените организациони делови на СДСМ, односно алатка во функција на СДСМ секогаш кога ним им е потребно да постигнат некаква цел.
Инаку, случајот „Титаник“ е првата истражна постапка што ја отвори СЈО, пред точно една година, а се однесува на изборни нерегуларности. Покрај Јанкулоска, во случајот меѓу осомничените се и поранешниот министер за транспрот и врски, Миле Јанакиески, генералниот секретар на владата, Кирил Божиновски, и градоначалникот на општината Пустец, во Албанија, Едмонд Темелко.
