Европарламентарците и земјите-членки на ЕУ постигнаа договор за значаен закон за заштита на природата, пренесува Гардијан. Законот за обнова на природата, важен столб на европскиот Зелен договор, ќе ги принуди земјите на ЕУ да санираат најмалку 20 отсто од европската земја и мориња до крајот на деценијата.
Законот содржи обврзувачки цели за обновување на најмалку 20 отсто од деградираните живеалишта до 2030 година, а се планира да се зголеми на 60 отсто до 2040 година и 90 отсто до 2050 година.
„Се соочуваме со сè подраматична реалност: природата и биодиверзитетот на ЕУ се во опасност и треба да се заштитат“, вели шпанската министерка за животна средина, Тереза Рибера.
Политичарите жестоко ги оспоруваа одредбите во законот со бурни реакции на зелените политики низ целиот континент. Опозицијата од Европската народна партија (ЕПП), централно-десничарската група на која и припаѓа претседателката на Европската комисија и шампионка на Зелениот договор, Урсула фон дер Лајен, речиси целосно го отфрли законот со гласањето во јули.
Активистите за заштита на животната средина понудија млака поддршка за договорот постигнат вчера меѓу Европскиот совет и парламентот.
„Малку ни олесна кога видовме дека преговарачите не ги разочараа европските граѓани целосно“, рече Софи Рујшерт, службеник за политика за реставрација на природата во Брдлајф Европа.
Од ЕПП истакнуваат дека има значајно подобрување и промени во законот, како делот кој порано велеше дека земјите не се обврзани да користат пари во земјоделскиот фонд на ЕУ за заштита на природата.
„Предлогот на комисијата беше идеолошки поттикнат, практично неостварлив и беше катастрофа за земјоделците, шумите, рибарите и локалните и регионалните власти, особено во густо населените области”, рече Кристин Шнајдер, германска европратеничка која беше вклучена во преговорите.
Природата умира побрзо од кога било досега во историјата со катастрофални последици за луѓето и планетата. Во Европа, каде што повеќе од 80 проценти од природните живеалиштата се во лоша состојба, законот за обновување на природата беше предложен во обид да се подобри оваа криза и да се намали глобалното затоплување.
Имено, ова е обврска на светските лидери кои ветија дека ќе заштитат 30 отсто од планетата до 2030 година на самитот за биолошка разновидност во Монтреал минатата година. Денес, само 17 проценти од копното во светот и 10 проценти од морињата се под заштита.
Заштитата на природата е евтин начин за заштита на луѓето од непогодните временски услови и клучна алатка за намалување на загадувањето и глобалното затоплување. Европската комисија проценува дека секое евро инвестирано во обновување на земјиштето ќе има поврат меѓу 8 и 38 евра.
Законот сега мора формално да биде усвоен од Европскиот парламент и совет пред земјите-членки да излезат со национални акциони планови за заштита. Преговарачите додадоа задача за комисијата да обезбеди преглед на парите што ЕУ може да ги собере и анализира на какви било празнини во финансирањето, една година по стапувањето на законот во сила.
