Турскиот претседател Реџеп Таип Ердоган најави дека неговата земја ќе го поддржи приклучувањето на Шведска во НАТО доколку Европската Унија ги отвори преговорите за членство за Турција, пренесува Би-би-си.
Ердоган рече дека ова ќе биде побарано на самитот на НАТО во Литванија неделава.
Ердоган рече дека Шведска презела чекори во вистинската насока со менување на антитерористичките закони, но дека тој сè уште има забелешки.
Унгарија, исто така, имаше забелешки околу шведската кандидатура за НАТО алијансата, но рече дека нема да го одложува процесот доколку Турција го смени својот став.
Шведска ѝ се придружи на Финска во обидите да стане членка на НАТО по руската инвазија врз Украина. Финска стана 31-та членка на алијансата во април, откако Турција ги повлече приговорите слични на оние што ги имаат и за апликацијата на Шведска.
Обидот на Анкара за влез во ЕУ е замрзнат со години. Земјите-членки гласаа за прекин на разговорите за ова прашање во 2016 година поради одговорот на Турција на неуспешниот обид за државен удар.
Односите меѓу блокот и Турција се подобрија, при што ЕУ се потпира на помошта на Турција за повеќе прашања, вклучително и миграцијата.