Бројот на жртвите од земјотресот што во средата го погоди централниот дел на Италија достигна 290 лица, откако во текот на ноќта во урнатините на градот Аматриче пронајдени се телата на уште три жртви.
Во Италија денеска е прогласен Ден на жалост, а одржани ќе бидат и првите погреби на жртвите.
Претседателот на Италија, Џорџо Матарела, го посети Аматриче, градот во централниот дел на земјата кој речиси целосно беше уништен во земјотресот.
Градоначалникот на Аматриче, Серџо Пироци, на Матарела му укажа на огромната штета што ја претрпе местото.
Претседателот се сретна и им се заблагодари на спасувачите кои од средата наутро работат 24 часа за да ги спасат граѓаните заробени во урнатините и да ги извлечат телата на загинатите.
Матарела подоцна во текот на денешниот ден ќе присуствува на погребот на некои од жртвите.