Амбасадорката на САД во земјава, Ангела Агелер, преку објава на „Икс“ ѝ честиташе победа на новоизбраната претседателка Гордана Силјановска-Давкова.
„Моите срдечни честитки до Гордана Силјановска-Давкова за нејзиниот историски избор за прва жена претседател на Северна Македонија. Честитки и за сите оние граѓани кои вчера го искористија своето избирачко право на претседателски и парламентарни избори. Соединетите Американски Држави ќе продолжат да ги поддржуваат вашите цели за безбедност, просперитет и целосна евроатланска интеграција на оваа земја“, напиша амбасадорката.
Силјановска-Давкова ѝ се заблагодари за честитките и напиша дека со нетрпение очекува да се обнови духот на македонско-американските односи, проширување на рамката на заедничкото стратешко партнерство и соработка, како во евроатлантската димензија, така и на билатерален план.