Во продолжение ја пренесуваме најновата проверка на Вистиномер на ветувањето на министерот Бочварски за автопатската делница Подмоље-Охрид.
Ветување: Очекувам по тоа што го разговаравме до 10 јули, дури правиме и притисок и пред тоа да завршат градежните активности во овој дел, за потоа да почнеме со последната фаза поставување на еластични огради и одобрување на времениот режим. Тоа што е важно е дека до 10 јули ќе биде оспособена оваа трака и ќе се вози по овој дел од автопатската делница и сметам дека за ударниот, главен дел од туристичката сезона ќе биде оспособена оваа траса и убеден сум дека тоа е од значење за граѓаните, градот и туризмот и сметам дека сите треба да дадеме поддршка за еден ваков прогрес и работа на терен, рече министерот Бочварски.
[Извор: OhridNews – изјава на министерот за транспорт и врски Благој Бочварски , датум: 16.06.2023]
ОБРАЗЛОЖЕНИЕ:
Ветувањето на министерот за транспорт и врски, Благој Бочварски дека градежните работи на делницата Подмоље-Охрид ќе бидат завршени до 10 јули и дека овој дел од патот ќе биде приспособен за сообраќај е исполнето.
На почетокот на градежните работи на оваа делница, министерот Бочварски, заедно со директорот на Јавното претпријатие за државни патишта, Ејуп Рустеми, ветија дека делницата Подмоље-Охрид ќе биде пуштена за сообраќај за ударниот дел од туристичката сезона.
Министерството за транспорт и врски и Јавното претпријатие за државни патишта на 5 јули објавија дека е вратена во сообраќај делницата од Подмоље до Охрид за сите возила и градежните активности на овој дел од патниот правец беа завршени пред зададениот рок.
Пред извесно време бевме тука заедно со директорот и ветивме дека ќе ги завршиме градежните работи на овој дел од влезот во Охрид. Денеска сме тука и пред рокот што го најавивме за да се увериме дека активностите се завршени. Од денеска повторно ќе ја вратиме во режим на времен сообраќај делницата од Подмоље до Охрид и ќе овозможиме сообраќајот да се одвива по главната траса. Ветивме дека сè што правиме е во насока на создавање на подобри услови за туристичката сезона, така ќе продолжиме и во наредниот период, изјави министерот Бочварски од Охрид.
Јавното претпријатие за државни патишта објави и фотографии од делницата на нивниот профил на Фејсбук. Информација и фотографии за тоа дека градежните активности на делницата Подмоље-Охрид се завршени и таа е повторно е пуштена за сообраќај, објавија и повеќе медиуми.
Делницата Подмоље – Охрид како дел од автопатот Кичево – Охрид, беше затворена за сообраќај речиси три недели поради градежни активности за изградба на клучка Охрид и истата требаше да биде пуштена до 10 јули. Додека се работеше на оваа делница сообраќајот беше пренасочен по стариот пат Охрид-Струга, каде се создаваа колони возила, што пак, предизвика голема нервоза кај возачите, но и револт кај туристичките работници кои реагираа дека патот се гради токму во време на летната сезона.
ИЗВОРИ:
- OhridNews (16.06.2023): Видео+фото: Бочварски очекува до 10 јули да биде приспособена за сообраќај делницата Подмоље-Охрид [Проверено: 06.07.2023]
- Мета (16.06.2023): Бочварски очекува до 10 јули да е приспособен за сообраќај автопатот на влезот од Охрид [Проверено: 06.07.2023]
- Веб-страница на Министерство за транспорт и врски (05.07.2023): Бочварски-Рустеми: Вратена во сообраќај делницата од Подмоље до Охрид за сите возила [Проверено: 06.07.2023)
- Објава на Фејсбук (05.07.2023) на ЈП за државни патишта/NP për rrugë shtetërore/PE for State Roads [Проверено: 06.07.2023]
- Тајм.мк (05.07.2023): Пуштена за сообраќај делницата Подмоље – Охрид [Проверено: 06.07.2023]
Оцени: Наум Локоски
