Бугарската влада ќе им дозволи на македонските државјани и на граѓаните на уште четири други земји да можат да влезат во оваа земја со негативен PCR тест, не постар од 72 часа, јавуваат бугарските медиуми.
На туристите од Северна Македонија, Молдавија, Србија, Израел и Кувајт ќе им биде дозволен влез во Бугарија со претходно извршено тестирање, објасни заменик-претседателот на Народното собрание на Бугарија, Валери Симеонов.
Тој вели дека на барање на туристичкиот сектор, во земјата ќе им се дозволи да влезат туристи коишто ќе обезбедат PCR тестови, не прецизирајќи кога точно ќе стапи на сила оваа мерка. Симеонов изјавил дека отворањето на границите за туристите од овие пет земји ќе биде многу сериозна помош за бугарските хотелиери, на кои во моментов им биле потребни странски туристи за да ги пополнат нивните капацитети.
Бугарија ги затвори границите за македонските државјани за периодот од 16 до 31 јули, со исклучок на граѓаните на нашата земја кои транзитираат преку Бугарија за да се вратат дома. Тогашната одлука беше донесена како резултат на влошената ситуација со корона вирусот во нашата земја, а оваа рестриктивна мерка покрај за Северна Македонија беше донесена и за граѓаните на Србија, Косово, Босна и Херцеговина, Црна Гора, Албанија и Турција.
