Денеска во велешкиот суд продолжи судењето на поранешниот претседател на Основниот кривичен суд – Скопје, Владимир Панчевски, чие прво рочиште беше во петокот. Тој изјавил дека не можел да ја подготви одбраната затоа што немал доволно време во текот на викендот и повторил дека не го разбира обвинението.
„Доказите ги видов во петокот кога увидот траеше до 17 часот. Преку викендот не се видов со бранителите и затоа не сум во можност да ја подготвам одбраната“, рекол Панчевски пред Судот и повторил, исто како на петочното рочиште, дека не го разбирал обвинението. Неговите адвокати и денеска побараа да му биде укинат притворот, бидејќи имале информации дека тој се уште е вработен во Основниот суд Скопје 1 и се уште има имунитет на судија.
Поради тоа што Панчевски се изјаснил дека не го разбира обвинението, судијката Валентина Ѓоргиевска повторно накратко му го образложила обвинителниот предлог, но Панчевски сепак, не можел да се изјасни дали се чувствува виновен.
Судењето продолжило со сведочење на неколку судии, поранешни колеги на Панчевски, кои денеска писмено се пожалија дека податоци за нивната работа се извлечени од АКМИС системот.
„Судиите Весна Димишкова и Славица Андрeева писмено се пожалија дека податоци за нивната работа се извлечени од АКМИС системот и не соодветствуваат со реалноста“, сведочеше денеска поранешниот претседател на Кривичен суд Скопје, Стојанче Рибарев, во процесот против неговиот поранешен колега и претходник на истата функција, Владимир Панчевски.
Според обвинението, Владимир Панчевски од 23 јануари 2013 година до 14 септември 2016 година, како претседател на Основен суд Скопје 1 Скопје, влијаел врз начинот на електронската распределба на предметите, наместо по случаен избор, преку системот АКМИС, тој ги распределувал предметите на рака кај судии, со што ја злоупотребил службата и ги пречекорил границите на овластувања.
Панчевски е во притвор во затворот во Шутка од 15 јули, откако сам се пријави во затворот.
