Од 2010 година до 2017 година, професионално, чесно и посветено ја извршував функцијата генерален секретар на Владата на Република Македонија, притоа почитувајќи ги сите законски пропишани процедури и постапки, вели поранешниот генерален секретар на Владата, Кирил Божиновски, како одговор на обвинувањата на сегашниот генерален секретар, Драги Рашковски, дека Божиновски вработил луѓе кои земале плата, а седеле дома и го оштетил буџетот за повеќе од 800.000 евра во 2016 година.
Според Божиновски, обвинувањата на Рашковски се „лаги и невистини“ и тој тврди дека сите постапки за вработување биле спроведени во согласност со законите.
– За секој вработен беше определено соодветно работно место и секој вработен ги извршуваше работните задачи било во Генералниот секретаријат, било во друга институција каде што вработениот беше упатен да извршува работни задачи. Да не заборавиме на политичката криза во која се наоѓаше државата и распишувањето на изборите во 2015/2016 година кога Владата на Република Македонија функционираше како техничка и голем дел од активностите што требаше нормално да бидат извршувани беа ставени во мирување. Помеѓу активностите кои беа ставени во мирување беше токму хоризонталното прераспоредување на вработените од една во друга институција, измена на правилниците за систематизација на работните места во институциите. Ова претставува причина поради која постапките за преземање и за прераспоредување на овие вработени формално-правно не беа докрај завршени, но во меѓувреме овие лица извршуваа работни задачи во Генералниот секретаријат на Владата во согласност со сите законски прописи – вели Божиновски во опширната изјава.
Поранешниот генерален секретар на Владата тврди дека сите вработени соодветно ги исполнувале сите права и обврски и користеле годишни одмори, боледувања, а редовно биле и оценувани.
– Небулозно е Драги Рашковски да се заканува дека ќе ми поднесе некаква си кривична пријава затоа што сум исплаќал плати на овие лица, кога и тој самиот на истите тие лица им ја исплатил платата за месеците мај, јуни и јули. Целосно и енергично ги отфрлам обвинувањата од сегашниот генерален секретар на Владата и најавувам соодветна судска постапка за заштита на мојот углед и на угледот на сите вработени во Генералниот секретаријат – додава Божиновски.
