Граѓаните да бидат спокојни. Мерките кои ги носи Владата со цел заштита на стандардот на граѓаните ќе се реализираат во целина. На следната седница на Владата ќе биде донесена одлука за намалување на цените на алкохолните и безалкохолните пијалоци, a се прави и анализа за намалување на цените на хигиенските производи, кажа министерот за економија Крешник Бектеши при денешната посета на „Алма М“, компанија од дистрибутивниот бизнис, која дистрибуира производи по маркетите опфатени со мерката „гарантирана цена“.
Бектеши потенцираше дека утре се очекува и владина одлука за поевтинување на цените на безалкохолните и алкохолните пијалоци, а за хигиенските производи најверојатно во текот на оваа недела ќе бидат завршени сите консултации.
Тој потенцираше дека Министерството за економија и сите надлежни институции прават анализи на неделна основа и врз основа на сите влезни податоци ќе се донесат одлуки кои што ќе бидат во интерес на заштита на стандардот на граѓаните.
Премиерот Димитар Ковачевски изјави дека со новата мерка на Владата на над 50 производи во 24 категории од пекарската, млечната и од месната индустрија им е намалена цената за 10 проценти во однос на цената што ја имале на 1 август.
„Со оваа одлука и мерка кај одредени категории и производи веќе има намалување на производите над 10 %, а кај некои намалувањето е од 30 до 40 %. Во маркетите веќе овие производи добија ознака ‘гарантирана цена’, со оваа мерка придонесуваме и покрај инфлациските притисоци, заеднички и солидарно им даваме поддршка на нашите граѓани“, рече Ковачевски.
