Кадровската комисија на Алијансата за Албанците, составена од 7 члена, како единствен орган на АА за кадровски прашања, со мнозинство од пет гласа одлучи да му предложи на премиерот Талат Џафери разрешување на министрите за информатичко општество и администрација и за здравство, Азир Алиу и Фатмир Меџити.
„Оваа одлука е донесена затоа што преку моќта на министерската функција, но без партиска позиција, двајцата министри спроведуваат дејствија кои се во спротивност со етичкиот кодекс, вклучително и уцени и притисоци врз членовите на АА и вработените, како и денешното јавно кокетирање со ВМРО-ДПМНЕ, посетувајќи го нејзиниот министер“, се вели во соопштението на Алијанса за Албанците.
Инаку, вчера министерот за внатрешни работи Панче Тошковски од ВМРО-ДПМНЕ се сретна со министерот за информатичко општество и администрација Азир Алиу и со дополнителниот заменик министер за информатичко општество и администрација Стефан Андоновски.
Министерот за здравство Фатмир Меџити изјави дека нема намера да се изјаснува дали има чувство на припадност кон оваа влада или не, како што побара техничкиот премиер од министрите на Алијанса за Албанците кои го поддржуваат Таравари. Тој рече дека не одговара пред никого, освен пред претседателот на партијата Арбен Таравари.
И министерот Азир Алиу е истомисленик со Меџити, па оттаму, голема е веројатноста доколку се подели Алијанса, двајцата министри да бидат разрешени.
Третиот министер во Владата од Алијанса за Албанците е министерот за правда Кренар Лога, кој застана на страната на Зијадин Села, претседател на партиското Централно собрание.
Села е со став дека Алијанса за Албанците не треба да влегува во предизборни коалиции со албанската опозиција, додека Таравари ја предводи иницијативата за изборно коалицирање со здружениот Европски сојуз за промени, каде што се вклучени Алтернатива (Африм Гаши), Демократско движење (Изет Меџити) и партијата Беса (Билал Касами).
За в сабота е закажана седница на централното претседателство, кога конечно ќе се знае судбината на Алијанса за Албанците.
Врие во Алијанса за Албанците, на конец виси тандемот Таравари-Села
