Претседателот на ВМРО-ДПМНЕ, Христијан Мицкоски денеска информираше дека на 11 јануари ќе имаат состанок на извршниот и централниот комитет на партијата, на кој ќе се разговара за кандидатите за министри и заменици-министри во техничката влада која треба да ја води земјава од 28 јануари.
Мицкоски денеска во одговорите пред новинарите не сакаше да прецизира за евентуални имиња на идните министри и заменици-министри во техничката влада. Тој го повтори ставот дека ВМРО-ДПМНЕ нема да го поддржи Талат Џафери за премиер на техничката влада.
„Талат Џафери не ја заслужува поддршката на ВМРО-ДМНЕ и ќе се воздржиме од гласање“, изјави денеска Мицкоски.
Техничка влада согласно актуелниот закон ќе има во земјава од 28 јануари, при што политичката партија ДУИ го даде предлогот за Талат Џафери како нејзин премиер. Оваа влада треба да ги организира претседателските и парламентарните избори што ќе се одржат напролет.
