Масовните собири за прославување на Денот на независноста на Украина во Кијив се забранети од денеска до четврток, во Харкив ќе стапи на сила продолжен полициски час од утревечер до четврток вечер, а властите и на другите градови низ Украина, меѓу кои и пристанишниот град Миколаив, повикаа на максимално внимание на населението и избегнување на јавните простори, пренесува Би-би-си.
Гардијан ги пренесува информациите на украинските власти, кои тврдат дека Русија го затворила воздушниот простор во нејзините погранични региони Липецк и Вороњеж за периодот од 22 до 25 август. Тензиите меѓу двете земји се зголемени и по атентатот на Дарија Дугина, ќерката на Александар Дугин кој се смета за идеолог близок до Владимир Путин.
Инаку, на 24 август се прославуваат 31 година од Денот на независноста на Украина, но и се одбележуваат шест месеци од почетокот на руската агресија врз оваа земја. Медиумите ги пренесуваат податоците на украинските власти дека звучните аларми во населените места што укажуваат на хемиски и нуклеарни опасности се додадени на сирените за воздушни напади.
Украинскиот претседател Володимир Зеленски во синоќешното обраќање до граѓаните предупреди дека Русија можеби планира да направи нешто одвратно за да го одбележи Денот на независноста на Украина.